ILOILO CITY- Nagapati si Iloilo 1st District Representative Janette Garin nga wala na sang paglaum nga mareporma pa ang Philippine Health Insurance Corporation (PhilHealth) kun indi pa masolbar ini nga problema sa ahensya paagi sa ginapatigayon nga imbestigasyon subong.
Sa interview sang Bombo Radyo kay Garin, iya ginpahayag nga tuman ka mabudlay ang magbutang sang reporma sa ahensya kag bilang anay tiglikom sang Department of Health, iya gin-ako nga ini ang pinaka-challenging nga organisasyon.
Suno sa mamalidha,apisar madamo ang matarong sa ahensya, nagakapilitan na lang ang iban sa ila nga maghipos ukon maghimbon sa mga kurakot bangud sa kahadlok nga madulaan sang trabaho.
Gintudlo naman ni Garin ang mga tawo sa legal kag finance department sa Central Office sang PhilHealth nga amo gid ang responsable sang mga anomaliya sa korporasyon.
Nagapati man si Garin nga naglala ang kurapsyon sa PhilHealth sang nagpungko sa posisyon si anay Health Secretary Paulyn Jean Rosell-Ubial.
Si Ubial ang nagbulos sa ginbayaan nga posisyon ni Garin bilang tiglikom kag gin-islan ni Secretary Francisco Duque III.
Suno kay Garin, mas naglala ang kinawatay sang pondo sa ahensya bangud sa mga garuk nga myembro sang board kun sa diin sadto nagpungko nga chairman si Ubial.
Nahibaluan nga sa termino ni Ubial bilang Health Secretary, tatlo ka beses sila nga nag appoint sang interim president sa PhilHealth.
