ILOILO CITY – Tatlo lang ka panibag-o nga kaso sang Coronavirus Disease 2019 (COVID-19) ang na record sang COVID-19 team sang Iloilo City Government as of August 13.
Sa interview sang Bombo Radyo kay Public Safety and Transportation Management Office Head Jeck Conlu nga nagaserbe man nga focal person for COVID-19, iya ginpahayag nga ang nasambit nga data ang na record as of 4:00 sang nasambit nga petsa.
Suno kay Conlu, ang tatlo ka kaso ang naghalin sa Brgy. Quintin Salas sa Jaro, Brgy. Q. Abeto sa Mandurriao kag Burgos St. sa La Paz apang kun basehan naman ang case bulletin nga ginpaguwa sang Department of Health Region 6 as of August 13, 60 ang COVID-19 cases nga naghalin sa Iloilo City.
Ginpahayag ni Conlu nga posible nga dulaon na ang selective lockdown sa Brgy. Cuartero kag Brgy. Simon Ledesma sa Jaro kag Brgy. Guzman-Jesena sa Mandurriao kun wala na sang may magdugang nga COVID-19 cases sa nasambit nga mga lugar.
May kaangtanan diri, ginakabig naman nga COVID-19 hotspot ang Brgy. San Juan sa Molo kag Brgy. Rizal Pala-Pala I kag Brgy. Rizal Pala-Pala II sa City Proper kag posible nga ideklarar ang total lockdown.
Samtang, nagapabilin naman sa 147 ang COVID-19 cases sa Business Process Outsourcing Company nga IQor kag 167 naman sa Iloilo Fish Port Complex apang kun basehan ang case bulletin sang Department of Health Region 6, nadugangan sang 20 ang COVID-19 cases sa IQor samtang may duha naman nga nagdugang sa Iloilo Fish Port Complex.
Sa pagpaathag ni Conlu, wala nagasanto ang data sang COVID-19 team kag sang Department of Health Region 6 sa kasubong nga adlaw bangud nga may yara sila sang nagkalain-lain nga cut-off time sa pagbaton sang data.
Sa bahin sang Department of Health Region 6, 11:00 am ang ila cut-off sa pagbaton sang data samtang 4:00 pm naman ang sa COVID-19 team.
Ang data sang COVID-19 team suno kay Conlu ang malakip sa case bulletin nga ipaguwa sang Department of Health Region 6 pagkasunod nga adlaw.
