ILOILO CITY – Wala anay nagabaton sang panibag-o nga specimen ang Western Visayas Medical Center Sub-National Laboratory kasunod sang pagpositibo sa Coronavirus Disease 2019 (COVID-19) sang anum ka Medical Technologists.
Sa interview sang Bombo Radyo kay Dr. Stephanie Abello, chief pathologist sa nasambit nga hospital, iya ginpahayag nga magluwas sa anum ka MedTechs, may pila pa ka medical staff nga naka-angkon sang close contact sa mga pastente nga ginpaidalom sa 14-day mandatory quarantine.
Suno kay Abello, ang iban nga medical staff ang nagnegatibo sa confirmatory test kag nakabalik naman sa trabaho agud tapuson ang backlogs sa specimen nga nabaton sang Agosto 10 tubtub 11.
Ginpahayag ni Abello nga sa subong, padayon ang releasing sang data may kaangtanan sa COVID-19 test results.
Una na nga gin-lockdown ang laboratory building sang nasambit nga hospital agud hatagan sang ligwa ang disinfection kasunod sang pagpositibo sa COVID-19 sang isa ka medical staff tubtub nga nadugangan ang numero sang infected sang virus.
