LEON, ILOILO – Naglab-ot sa 31 ka call center agents ang nalakip sa listahan sang mga nakapauli sa Leon, Iloilo.
Sa interview sang Bombo Radyo kay Mayor Ma. Lina Holipas, iya ginpahayag nga ang 31 ka call center agents ang lunsay nagatrabaho sa IQor nga may mataas nga COVID-19 cases.
Suno kay Holipas, isa sa mga call center agents ang nagpositibo sa COVID-19 kag sa subong nagapabilin sa quarantine facility samtang naka-home quarantine naman ang iya pamilya.
Ginpahayag ni Holipas nga nagapadayon sa subong ang contact tracing sa posible naka-close contact sang mga call center agents nga wala nagpahibalo sa Local Government Unit nga nagpauli sa nasambit nga banwa.
Gin-athag sang alkalde nga wala sang problema ang pagpauli sang mga call center agents apang ang importante amo nga may yara sang koordinasyon agud nga mas mapahapos ang contact tracing sa tion nga may magpositibo sa COVID-19.
May kaangtanan diri, wala pa sang sabat ang tagdumahalan sang IQor tuhoy sa reklamo sang alkalde.
