Ginabanta 1,000 nga mga Pilipino ang makigbahin sa third and final phase sang clinical trials para sa Sputnik V vaccine sang Russia batuk sa Coronavirus Disease 2019 (COVID-19).
Suno kay Philippine Council for Health Research and Development (PCHRD) director Dr. Jaime Montoya, ang trial ang magalawig sa tatlo tubtob anom ka bulan matapos ini nga maaprubahan sang Food and Drug Administration.
Ang 1,000 nga mga Pilipino ang gikan sa mga komunidad nga may high transmission agud mahibaluan kun bala epektibo ang bakuna.
Pagkatapos sini, ang resulta sang Pilipinas kag iban pa nga mga pungsod nga kabahin sa Phase 3 sang clinical trial ang tingbon kag pagatun-an.
Nakakuha man ang Pilipinas sang confidentiality agreement agud nga matun-an ang bakuna sang Russia.
Pahayag pa ni Montoya, indi pa mahimo nga ma-rehistro sa Pilipinas ang bakuna tubtob nga makumpleto na ang Phase 3 trial.
Mahimo naman dugang sang natungdan nga mangin available na sa pungsod ang Sputnik V sa Abril 2021.
