ILOILO CITY – Magapatigayon anay sang inspection ang COVID-19 team antes buksan ang Iloilo Terminal Market lakip na ang Iloilo Fish Port Complex.
Sa interview sang Bombo Radyo kay Public Safety and Transportation Management Office Head Jeck Conlu nga nagaserbe man nga focal person for COVID-19 sang Iloilo City Government, iya ginpahayag nga target nga buksan ang Iloilo Terminal Market sa Agusto 17.
Suno kay Conlu, ang Iloilo Fish Port Complex naman ang buksan umpisa buwas nga adlaw, Agosto 15 ukon 16 depende sa resulta sang patigayunon nga inspection.
Ginpahayag ni Conlu nga antes buksan sa publiko, kinahanglan nga usisaon anay kun bala naplastar sang maayo ang minimum health protocol nga ipatuman sa pinaka-daku nga merkado sa syudad lakip na sa fish port kasunod sang na record nga COVID-19 cases.
Naglab-ot naman sa 25 ka panibag-o nga kaso sang COVID-19 ang na record sa syudad sang Iloilo as of August 14.
Sa pagpaathag ni Conlu, ang nasambit nga data ang posible nga malakip sa case bulletin sang Department of Health Region 6 buwas nga adlaw, Agusto 15 bangud nga 11:00 am ang cut-off sang pagkuha sang data sang nasambit nga ahensya samtang 4:00 pm naman ang sa COVID-19 team.
May kaangtanan diri, ginpahayag sang natungdan nga padayon pa ang pagpangusisa sang COVID-19 team kun sa diin nga mga barangay sa syudad na record ang 25 ka COVID-19 cases.
Nagdugang sa mga barangay sa syudad nga ginpaidalom sa selective lockdown amo ang Brgy. Ortiz sa City Proper kag Brgy. Benedicto sa Jaro samtang magapadayon naman ang selective lockdown sa Brgy. Rizal Pala-Pala 1 kag Brgy. Rizal Pala-Pala II, Brgy. Tanza Baybay kag Brgy. Tanza Bonifacio sa City Proper.
Gindula naman ang selective lockdown sa Brgy. Simon Ledesma kag Cuartero sa Jaro, Brgy. Guzman-Jesena sa Mandurriao kag Brgy. Rizal Estanzuela sa City Proper bangud nga wala na sang may nagdugang nga COVID-19 cases sa of 4:00 subong nga adlaw.
