Mahimo nga maka eksperyensya sang financial difficulties ang pila ka mga ospital sa pungsod matapos nga gin-suspende sang Philippine Health Insurance Corp. (PhilHealth) ang Interim Reimbursement Mechanism (IRM) kasunod sang isyu nga ginakaulamiran sang ahensya.
Suno kay PhilHealth Vice President for Corporate Affairs kag Spokesperson Dr. Shirley Domingo, apisar nga gin-suspende ang IRM, padayon sa gihapon ang benepisyo sang mga myembro sang PhilHealth apang ang iban sa mga ospital ang mahimo nga wala sang bastante nga pondo.
Ang Interim Reimbursement Mechanism ang isa ka sistema sa diin ginabaydan sang PhilHealth ang ospital kag healthcare facilities.
Pahayag naman sang Philippine Hospital Association, ang pagsuspende sa IRM ang isa ka seryoso nga butang bangud madamo sang mga pampubliko kag pribado nga mga ospital ang maka experiensya sang kabudlay sa tunga sang COVID-19 pandemic.
