May mga nagkaladakpan nga mga driver sa Western Visayas may kaangtanan sa memorandum circular nga ginpapanaog sang Department of Transportation sa diin mandatory na ang pagsuksok sang face shield epektibo, Agosto 15.
Sa una nga adlaw nga pagpatuman sang nasambit nga pagsulundan, nagpatigayon sang operasyon ang Land Transportation Office Region 6 kaupod ang Highway Patrol Group sang Iloilo City Police Office kag Public Safety Transportation and Management Office kag may mga deputized personnel man sa iban nga bahin sang rehiyon nga nagbantay sa mga pampubliko nga transportasyon kun bala ginasunod ang pagsuksok sang face shield.
Sa interview sang Bombo Radyo kay Riza Otayde, tagpamaba sang Land Transportation Office Region 6, iya ginpahayag nga sa bahin sang syudad sang Iloilo, 26 ka mga driver ang ginpang-ticketan bangud wala ini nagasuksok sang face shield ukon may pasahero nga ginpasakay nga wala nakasuksok sang face shield.
Sa probinsya sang Iloilo, may yara sang 14 ka mga driver nga ginpang ticketan man, siyam sa Negros Occidental samtang ginatipon pa ang data sa iban nga mga lugar sa Western Visayas.
Bangud sini, ginpang-multahan ang mga driver sang P2,000 bilang 1st offense.
Apang kun madakpan liwat ang driver, pagamultahan ini sang P4,000 kag 30 ka adlaw nga suspensyon sang driver’s license bilang 2nd offense kag P10,000 naman kag pag-revoke sang lisensya sa 3rd offense.
