ILOILO CITY – Ginkumpirma ni Punong Barangay Ramon Amoroso sang Q. Abeto, Mandurriao, Iloilo City nga residente sang ila lugar ang COVID-19 positive nga call center agent nga nagpamalibad nga dal-on sa quarantine facility.
Sa interview sang Bombo Radyo kay Amoroso, iya ginpahayag nga nagpakatig-a nga mag-upod sa quarantine facility ang babayi nga call center agent sang iQor.
Suno kay Amoroso, madamo sang demand ang nasambit nga call center agent bangud luyag niya nga mangin kumportable ang iya pagtinir sa quarantine facility.
Ginpahayag ni Amoroso nga makapila nila ka bes nga ginpadulungan ang balay sang nasambit nga call center.
Sa pihak sini, as of August 15, naubos na dala sa quarantine facility ang tanan nga COVID-19 positive.
Sa subong, ginpahayag sang natungdan nga padayon ang contact tracing sa ila lugar.
