ILOILO CITY-Nangin palaagyan sang sadto-anay public servant sa banwa sang Tigbauan, Iloilo ang iya paintings agud makabulig sa mga eskwelahan sa ila banwa nga nagakinahanglan sang kagamitan para sa mga learning materials.
Sa interview sang Bombo Radyo sa anay public servant kag sa subong Chairman Of The Board sang TIPP-Digital Solutions Inc. nga si Atty. Donel Trasporto, iya ginpahayag nga nag umpisa ang iya kawsa nga ‘paintings para sa edukasyon’ sang nakita niya ang isa ka facebook post sang manunudlo nga nagapangayo sang bulig para sa kinahanglanon nga materials para sa pagtuon sang mga kabataan.
Suno kay Trasporto, nagdesisyon siya nga ipaagi sa bidding ang iya mga nahuman na nga paintings agud makatipon sang bulig para sa mga eskwelahan sa banwa sang Tigbauan.
Ang iya mga abyan suno kay Trasporto ang una nga nagsakdag ang iya paintings kag may yara man sang iban nga boluntaryo nga naghatag sang ila bulig para sa mga eskwelahan nga nagakinahanglan.
Sa subong suno sa natungdan, nagdangat na sa 14 ka mga eskwelahan sa ila banwa ang nahatagan nila sang bulig para sa mga learning materials sang mga kabataan.
