Record high ang numero sang mga nag-ayo sa coronavirus disease 2019 (COVID-19) nga gin-report sang Department of Health as of August 16, 2020 bangud sa Oplan Recovery.
Nagdugang sang 40,397 ang mga naka recover sa COVID-19 sa Pilipinas kun sa diin naglab-ot sa 112,586 ang kabug-usan nga numero sang mga nag-ayo nga pasyente.
Ang Oplan Recovery amo ang pag-update kag pag-check sang mga datos sa lokal kag national level kun sa diin ang mga sadto asymptomatic kag mild cases ang ginakabig na nga recovered kun natapos na ang 14 ka adlaw nga quarantine.
Samtang, may nag dugang naman nga 3,420 ang bag-o nga kumpirmado nga kaso sa diin 161,253 na ang kabug-usan nga numero sang COVID-19 cases sa pungsod.
Bangud sa kadamuon sang naka-recover, 46,002 na lang ang active case ukon ang mga wala pa nag-ayo sa balatian.
Nagsaka naman sa 2,665 ang death toll matapos maka-rekord ang DOH sang 65 ka mga nag dugang sa mga napatay.
Samtang sa bilog nga kalibotan, may yara na sang 21,698,904 nga kaso sang COVID-19, 770,512 ang napatay kag 14,407,115 ang mga naka-recover.
