BUENAVISTA, GUIMARAS – Natalana na nga maga-abot sa Buenavista, Guimaras ang bangkay sang domestic helper nga isa sa mga napatay sa massive explosion sa Beirut, Lebanon.
Sa interview sang Bombo Radyo kay Mayor Eugene Reyes, iya ginpahayag nga mismo ang pamilya ang nagkumpirma nga maga-abot sa Guimaras ang bangkay ni Milagros Sumaculob, 65 anyos, nga 25 na ka tuig nga nagatrabaho sa nasambit nga pungsod.
Suno kay Reyes, pag-abot sa Ninoy Aquino International Airport sa Metro Manila, igakarga sa C130 plane ang bangkay agud dal-on sa Iloilo International Airport ukon iga-deretso na lang sa banwa sang Buenavista.
Ginpahayag ni Reyes nga bilang bulig sang Local Government Unit, ginpakay-o na ang dalan padulong sa balay kun sa diin igahaya ang bangkay santo sa hingyo sang pamilya.
Buwas nga adlaw, Agosto 17, maga-abot na sa Pilipinas ang bangkay sang biktima.
Bangud nga indi man COVID-19 related ang ginkamatay sang biktima, ginpahayag sang alkalde nga ginpahanugutan nga indi na lang pag i-cremate ang bangkay.
Nahibalu-an nga si Sumaculob ang naghalin sa balay sang iya employer kag nagapauli na sa ginatiniran nga apartment sang natabo ang massive explosion sa port area sa Beirut.
