ILOILO CITY – Nagpaguwa sang panibag-o nga Executive Order si Iloilo City Mayor Jerry Treñas may kaangtanan sa pagpaidalom sa syudad sang Iloilo sa General Community Quarantine.
Santo sa Executive Order nga pirmado sang alkalde nga napetsahan nga Agosto 16, nakasaad nga ang Iloilo City ang yara sa General Community Quarantine epektibo Agosto 16 tubtub Agosto 31 magluwas lang kun may yara sang deklarasyon ang National Inter-Agency Task Force on the Management of Emerging Infectious Diseases.
Nakasaad man nga ang curfew sa bug-os nga syudad sang Iloilo ang maga-umpisa 8:00 sa gab-i tubtub 4:00 sa kaagahon apang exempted ang mga nagatrabaho paglampas sa gintalana nga oras.
May limited movement naman nga ginhatag sa mga naga-edad sang 60 anyos pasaka, mga naga-edad sang mas manubo sa 21 anyos, mga nagabusong, may balati-an kag Persons with Disabilities.
Ginadimili-an ang pagbukas sang mga negosyo nga may kaangtanan sa spa, massage kag facial services, sports facilities, travel agencies, amusement parks, personal care services kag ginadumili-an ang tanan nga sahi sang mass gatherings.
Ang trabaho naman sa Iloilo City Government ang may yara sang adjustment kasubong sang work-from-home arrangement sa mga ginakabig nga vulnerable sector samtang compulsory naman ang pagsuksok sang face mask kag face shield sa tanan nga may transaksyon sa Iloilo City Hall.
Epektibo man sa gihapon ang liquor ban sa bug-os nga syudad kag dapat nga magsuksok sang face mask sa tion nga magsakay sa pampubliko nga salakyan.
