Liwat nga nagpaandam ang National Bureau of Investigation sa pagtaas sang mga kaso sang online scams subong nga panahon sang pandemya kun sa diin nangin patok ang industriya sang online selling, online bank transactions kag paggamit sang online application sang gobyerno sa pagkuha sang ayuda.
Suno kay NBI Officer-in-Charge Eric Distor, masami nga gamit sang mga scammer amo ang mga peke nga website ukon link, online selling, mga nagapakuno-kuno nga makaluluoy ukon nagapangayo sang donasyon, investment scam, pagkuha sang personal nga impormasyon kag paggamit sang mga mobile applications.
Nagpanugyan man si NBI Cybercrime Division head Victor Lorenzo sa publiko nga indi gid pag-ihatag sa bisan sin-o lang ang one time PIN.
Mahimo nga i-report sang publiko ang mga ginadudahan nga scam ukon ang mga nabiktima sang online scammers sa hotline number nga 523-8231.
