ILOILO CITY – Masobra sa 300 ka mga commercial establishments sa Western Visayas ang nagsirado bangud sa ginapatuman nga community quarantine.
Sa interview sang Bombo Radyo kay Niezel Sabrido, tagpamaba sang Department of Labor and Employment Region 6, iya ginpahayag nga as of August 17, naglab-ot na sa 359 ka negosyo ang nagsirado nga nag-apekto sa 2,922 ka empleyado.
Suno kay Sabrido, indi lang niya mapatpat ang detalye apang kalabanan sa mga negosyo nga nagsirado ang nahamtang sa Iloilo, Negros Occidental kag Aklan.
Ginpahayag ni Sabrido nga lakip sa most affected business ang may kaangtanan sa accommodation and food service, manufacturing, administrative and support service, wholesale and retail trade, repair of motor vehicles and motorcyle kag transportation and storage.
Ang iban sa mga kompaniya sa Rehiyon 6 nga wala nagsirado ang nagpamuhin naman sang numero sang empleyado ilabi na sang Hunyo kag Hulyo.
Santo sa data sang Philippine Statistics Authority as of April 2020, 13.7% ang ginsaka sang unemployment rate sa Western Visayas.
Apisar sini, ginpahayag sang natungdan nga ang 13.7% ang tuman ka gamay kun ipaanggid sa minilyon nga labor force sa Rehiyon 6.
Sa nasambit nga numero, wala diri nalakip ang mga nagpauli nga Locally Stranded Individual.
