CATAINGAN, MASBATE – Mahimo pa nga madugangan ang P50 million nga balor sang halit kasunod sang nagluntad nga magnitude 6.6 nga linog sa Cataingan, Masbate.
Sa interview sang Bombo Radyo kay Jhovel Carocha, Municipal Disaster Risk Reduction and Management Officer sang nasambit nga lugar, iya ginpahayag nga sa subong, padayon ang damage assessment kun sa diin ang kalabanan sa mga edipisyo ang nagkalaguba kag wala na ginapanugyan nga gamiton pa.
Suno kay Carocha, as of August 18 sang gab-i, indi magnubo sa 30 ka aftershocks ang na record kag mahimo nga makatuga sang dugang nga damage sa mga pamalay, simbahan, hotel kag iban pa nga commercial establishment.
May 11 ka pamilya ukon 40 ka indibidwal ang ginpatinir sa Cataingan National High School matapos nga naguba ang ila balay bangud sa mabaskog nga linog samtang may isa naman ka coastal barangay nga nag-usmod kag nalab-ot sang tubig ang mga pamalay.
Ginabanta nga 36 ka barangay ang nahamtang malapit sa fault line kun sa diin ang mga residente ang ginapanugyan nga indi anay magbalik sa sulod sang ila balay bangud posible pa nga magluntad ang mabaskog nga pagtay-og.
May kaangtanan diri, may na record man nga landslide kun sa diin ang iban nga karsada ang indi na maagyan.
Isa ka retired police personnel ang napatay matapos nadagdagan sang debris sang narumpag nga balay samtang 12 naman ang reported nga naka-angkon sang minor injuries.
