ILOILO CITY- Patay ang isa ka anak matapos gintiro kag ginlabo sang iya amay sa Brgy. Aglobong, Janiuay, Iloilo.
Ang biktima amo si Vincent Mamon, 27, samtang ang suspek naman amo si Ceasar Mamon, 54, kag lunsay residente sang amo nga lugar.
Sa interview sang Bombo Radyo kay PCapt. Eleazar Climacosa, hepe sang Janiuay Municipal Police Station, iya ginpahayag nga base sa imbestigasyon, padulong kuntani ang duha sa brgy hall agud husayon ang ila away sa duta.
Suno kay Climacosa, antes sila maka abot sa brgy. hall, nagsumalangay ang mga ini sa diin una nga nagbunot sang armas ang biktima kag gintiro ang suspek nga naigo sa tiil kag kamot.
Sang nagtalikod ang anak kag hana kuntani nga magpalagyo, nagbunot man sang armas ang suspek kag gintiro ang biktima nga naigo sa likod..
Wala pa nakontento ang amay kag ginlabo pa ang iya anak.
Naggwa sa pagpangusisa nga gintamnan sang anak sang saging ang duta sang iya amay rason nga naglain ang buot sini tubtob nga nagsingki ang ila konplikto.
Dead on arrival sa ospital ang biktima samtang naka- hospital arrest naman ang suspek.
Narecover sa crime scene ang armas- luthang nga ila gin-gamit.
Kaso nga parricide ang mahimo ipasaka batok sa amay.
