ILOILO CITY- Napagapakitluoy ang mga drayber sang dyip nga hatagan sila sang konsiderasyon sa tunga sang ginapatuman nga mandatory nga pagsuksok sang face shield sa mga pampubliko nga salakyan sa diin multahan ang drayber kun wala nagatuman ang pasahero.
Sa interview sang Bombo Radyo kay Mr. Edgar Salarda sang Pinagkaisang Samahan ng mga Tsuper at Opereytor Nationwide (Piston)-Panay, iya ginpahayag nga sa baylo nga intindihon ang pigado nga sitwasyon sang mga draybrr sa tunga sang pandemya, mas ginatum-ok kag ginapabudlayan pa gid sila sang gobyerno.
Suno kay Salarda, kaangay nga nagapinalagpat lang ang Land Transportation Office sa pag-isyu sang Temporary Operator’s Permit sa mga drayber nga madakpan nga may yara sang ginpasakay nga pasahero nga wala sang face shield sa diin reckless driving ang ginabutang nga violation kag P2000 ang multa.
Nagpanawagan naman si Salarda sa tanan nga drayber nga na-isyuhan sang T.O.P. nga tipunon ini agud ila gamiton sa pagpasaka sang formal complaint sa Land Transportation Franchising and Regulatory Board.
