ILOILO CITY- Ginbawian sang kabuhi matapos nagpositibo sa COVID-19 ang duha ka tuig nga bata nga lalaki sa Lapuz, Iloilo City.
Sa interview sang Bombo Radyo kay Mr. Jeck Conlu, head sang Public Safety and Transportation Management Office kag focal person for COVID-19 sa Iloilo City, iya ginpahayag nga Agusto 15 sang gin-admit sa St. Paul’s Hospital ang bata matapos nagsuprir sang hilanat kag diarrhea.
Suno kay Conlu,ginpaidalom ini sa swab test apang ginbawian ini sang kabuhi kahapon sang aga, Agusto 19 antes naggwa ang resulta sang iya RT-PCR test kahapon sang hapon sa diin positibo ini sa virus.
Pahayag ni Conlu, makabig nga new case ini bangud wala man ini sang exposure sa iban nga tawo.
Gilayon naman nga ginpaidalom sa strict home quarantine ang tanan nga miembro sang pamilya nga may close contact sa bata.
