ILOILO CITY- Naglab-ot na sa 16 ang infected sang COVID-19 sa Calumpang, Molo, Iloilo City.
Sa interview sang Bombo Radyo kay Punong Barangay Roberto Niño, ang pinakaulihi nga na-infect sang virus amo ang isa ka 45- anyos nga lalaki, symptomatic kag na-admit sa St. Paul’s Hospital humalin sang Agusto 15.
Suno kay Niño, immunocompromised ang pasyente bangud may ginasuprir ini nga diabetes.
Ginpaidalom naman sa lockdown ang balay sang pasyente kag natalana nga ipaidalom sa swab test ang siyam ka myembro sang iya pamilya.
Sa subong, sa 16 ka mga kaso sa Calumpang, pito ang naangot sa infection sa fish port, apat ang government employees, duha ang call center agents, isa ang Locally Stranded Individual, kag isa ang Returning Overseas Filipino, samtang isa naman ang narecord nga patay.
