ILOILO CITY – Ginkumpirma ni Punong Barangay Efren Gimeo nga residente sang Jalandoni Estate, Lapuz, Iloilo City ang duha ka tuig nga bata nga lalaki nga napatay bangud sa Coronavirus Disease 2019 (COVID-19).
Sa interview sang Bombo Radyo kay Gimeo, iya ginpahayag nga pila ka adlaw ang nagligad, gindala sa St. Paul’s Hospital of Iloilo ang bata bangud sa pagsakit sang tiyan, pagpalanuka kag nakitaan man sang sintomas sang Pneumonia.
Suno kay Gimeo, ginkumpirma ni Dr. Rebecca Gregorios, ang doktor nga na-assign sa ila lugar, nga napatay ang bata kahapon, Agosto 19, bangud sa COVID-19.
Ginpahayag ni Gimeo nga posible nalatnan sang COVID-19 ang bata bangud masami ini nga nagasayo sa laundry shop nga ginapanag-iyahan sang ila pamilya.
Bangud sini, natalana nga ipaidalom sa COVID-19 test ang tanan nga naga-istar sa sulod sang 50-meter radius gikan sa nahamtangan sang laundry shop.
Ang duha ka tuig nga bata ang labing una nga COVID-19 casualty sa Brgy. Jalandoni Estate.
