PAVIA, ILOILO – Wala sang kamatuoran nga may yara sang mga opisyal sang Local Government Unit sang Pavia, Iloilo nga nakatambong sa birthday party kun sa diin yara man ang presensya sang isa ka Non-Uniformed Personnel sang Police Regional Office 6 nga nagpositibo sa Coronavirus Disease 2019 (COVID-19).
Ini ang gin-athag sa Bombo Radyo ni Mayor Luigi Gorriceta matapos naglapta ang balita nga isa siya sa nakatambong sa nasambit nga party.
Sa interview sang Bombo Radyo kay Gorriceta, iya ginpahayag nga nakumpirma sa contact tracing nga ang mga nakatambong sa birthday party amo ang mga opisyal sang homeowners association sang Deca Homes Phase 2 sa nasambit nga banwa.
Suno kay Gorriceta, may yara na sang pito ka balay nga gin-lockdown kag may yara naman sang mga ginpaidalom sa quarantine nga posible naka close contact sa COVID-19 positive.
Ginpahayag ni Gorriceta nga padayon ang monitoring sang homeowners association agud nga indi na madugangan ang COVID-19 cases sa ila subdivision.
