SIBALOM, ANTIQUE – Yara na sa estable nga kondisyon ang tatlo ka mga bombero matapos nadulaan sang preno ang ginasakyan nga firetruck sa Sitio Bato, Brgy. Salvacion, Sibalom, Antique kun sa diin duha ang patay.
Matandaan nga lakip sa mga ginbawi-an sang kabuhi amo sanday Fire Officer 2 Joy Ardania nga amo ang driver sang firetruck kag Fire Officer 1 John Daryl Peralta samtang pilason naman sanday FO1 Judy Baldone, FO1 Charmie Leigh Forro kag FO1 Rechelle Lustica.
Sa interview sang Bombo Radyo kay Fire Senior Inspector Stephen Jardeleza, tagpamaba sang Bureau of Fire Protection Region 6, iya ginpahayag nga si FO1 Forro ang nagakaon kag naga-inom na sang tubig matapos gintakdan sang chest tube agud makuha ang hangin sa iya baga kag natalana naman nga ipaidalom sa X-Ray matapos naka-angkon sang fractured ribs.
Si FO1 Lustica naman suno kay Jardeleza ang operahan agud matinlu-an ang pilas sa nawala nga tiil samtang si FO1 Baldone ang napaidalom na sa ultrasound kag natalana nga ipaidalom sa chest X-Ray.
Ginpahayag ni Jardeleza nga santo sa imbestigasyon, nagapondo sa sagwa kag hana na nga magsulod sa Villafont Elementary School ang firetruck para sa Brigada Eskwela apang hinali lang nga nabati-an ang matunog nga mechanical problem.
Bangud dulhugon ang dalan, nadulaan sang preno ang firetruck kag bangud sini, ginpatunog sang driver nga si FO1 Ardania ang sirena bilang palatandaan nga may emerhensya.
Makaduha ka bes nga nagligid ang firetruck kag nagsagaid sa poste sang kuryente.
