CALINOG, ILOILO – Posible nga ginbiring samtang nagatabok sa suba rason nga nalunod-patay ang isa ka amay kag nasapwan sa Brgy. Gines Viejo, Passi City.
Sa interview sang Bombo Radyo kay Rodolfo Valencia, Municipal Disaster Risk Reduction and Management Officer III sang Calinog, Iloilo, iya ginpahayag nga Agosto 18, sang nagtabok sa suba ang biktima nga si Rodolfo Espinosa Jr., legal ang edad, kaupod ang 20 anyos nga anak agud nga magpauli.
Suno kay Valencia, bangud naga-ulan kag mabaskog ang ilig sang tubig, nalunod ang mag-amay apang nakasampay sa pangpang ang 20 anyos nga anak samtang gin-anod naman ang amay nga Espinosa samtang nagatabok sa suba sa Brgy. Badu sa banwa sang Calinog.
Ginpahayag ni Valencia nga isa ka laborer ang biktima kag nagaserbe nga padre de pamilya sa siyam ka kabataan.
Bangud nga pila na ka adlaw ang nakaligad, ginpahayag sang MDRRM Officer nga baho na sang nasapwan ang bangkay sang biktima.
