DUMANGAS, ILOILO – Indi magnubo sa 10 ka mga opisyal sa Dumangas, Iloilo ang nagpaidalom sa 14-day home quarantine matapos naka-angkon sang close contact ang duha ka Sangguniang Bayan Members sa COVID-19 positive paagi sa pagtambong sa belasyunan.
Sa interview sang Bombo Radyo kay Vice Mayor Almar Marfito, iya ginpahayag nga ang duha ka SB Members nga amo ang may close contact sa COVID-19 positive ang ginapanugyanan nga magpakuha sang swab sample para sa COVID-19 test.
Nalakip sa mga ginpaidalom sa home quarantine amo ang 7 ka SB Members, 2 ka Ex-Officio Members, isa ka Punong Barangay, pila ka empleyado sang munisipyo kag lakip na diri ang bise alkalde kun sa diin sila ang natalana nga magpaidalom man sa confirmatory test.
Suno kay Marfito, antes pa man sila nagpatigayon sang sesyon, nakapadulong na sa belasyunan ang duha ka SB Members.
Si Mayor Ronaldo “Onal” Golez naman ang nakapaidalom na nga daan sa quarantine matapos naka-angkon sang close contact sa empleyado sang AC Energy nga una nga nagpositibo sa COVID-19.
Ginabanta nga tatlo na lang ka adlaw kag makatapos na sa quarantine ang alkalde.
Kun kinahanglanon, magapatigayon sang sesyon sa masunod nga semana ang Sangguniang Bayan paagi sa online.
