ILOILO CITY – Naalarma si Iloilo City Councilor Jojo Javellana bilang chairman sang Committee on Police Matters sa konseho, sa nagakatabo nga riding-in-tandem incidents.
Ini ang kasunod sang pagluthang-patay sang wala pa makilala nga riding-in-tandem suspects sa 17 anyos nga solterito nga nagahampang sa sulod sang computer shop sa Brgy. Salvacion Habog-Habog sa distrito sang Molo.
Sa interview sang Bombo Radyo kay Javellana, iya ginpahayag nga nagakahangawa siya sa estado sang seguridad sa syudad sang Iloilo ilabi pa nga wala ginadula ang posibilidad nga mistaken identity lamang ang natabo.
Suno kay Javellana, sang natabo kahapon, Agosto 20, ang pagluthang-patay sa solterito, iya gilayon nga ginpakig-angutan ang chief of police sang Molo Police Station nga si Police Major Engelbert Banquillo kag si Iloilo City Police Office Director Police Col. Eric Dampal.
Ginpahayag ni Javellana nga “as soon as possible” ang iya ginhatag nga ultimatum may kaangtanan sa paghatag sang development sa nasambit nga kaso.
