ILOILO CITY – Wala sang problema kag nakahanda nga magsunod ang Simbahang Katolika sa mga pagsulundan sang Inter-Agency Task Force may kaangtanan sa ginapatuman nga community quarantine sa pungsod.
Ini ang kasunod sang panibag-o na naman nga desisyon sang Inter-Agency Task Force may kaangtanan sa pag-limit sa numero sang mga deboto nga mahimo makatambong sa misa kun sa diin 50% capacity lamang para sa mga lugar nga ginpaidalom sa Modified General Community Quarantine samtang 10% naman sa General Community Quarantine.
Sa interview sang Bombo Radyo kay Msgr. Meliton Oso, director sang Jaro Archdiocesan Social Center, iya ginpahayag nga nagasunod gid sa protocol ang Simbahang Katoliko apang ang wala lang niya naluyagan amo ang pabag-o bag-o nga desisyon sang Inter-Agency Task Force.
Isa sa ginhalimbawa ni Msgr. Oso amo ang pagbutang sang barrier sa motorsiklo nga ginabalabagan mismo sang mga eksperto kag sang damlag lang, ginbawi naman sang Inter-Agency Task Force ang nasambit nga mandu.
Suno kay Msgr. Oso, kasubong nga nagadesisyon kag nagapatuman lamang sang pagsulundan ang Inter-Agency Task Force nga wala sang common sense.
Kun tani suno sa natungdan, pamati-an sang Inter-Agency Task Force ang panugyan sang nagkalain-lain nga sektor bangud nga ang ordinaryo nga mga tawo ang nagakaapektuhan sang lubos.
May kaangtanan naman sa ika-37 nga death anniversary ni anay Sen. Benigno “Ninoy” Aquino Jr., ginpahayag ni Msgr. Oso nga matahum kag may madalom nga kahulugan ang ginbuy-an nga pahayag sang anay senador nga “The Filipinos are Worth Dying For”.
Kun tani suno sa JASAC director, magapabilin nga buhi sa mga ulihing tubo ang maayo nga hinimu-an ni Aquino.
Ginpahayag ni Msgr. Oso nga kasubong kay Aquino, ang mga kritiko ang indi kaaway kundi abyan sang gobyerno nga luyag lamang tadlungon ang mga tiko nga pagsulundan.
Ginakasubo naman ni Msgr. Oso ang mga nagakatabo nga riding-in-tandem incidents sa syudad sang Iloilo kun sa diin case unsolved ang kalabanan sa mga krimen.
Bilang kabahin sang Regional Advisory Council sang Philippine National Police, mismo siya suno kay Msgr. Oso ang nagaprangka nga ang panan-awan sang publiko amo nga state-sponsored ang riding-in-tandem incidents.
Bangud sini, ginahangkat sang natungdan ang Philippine National Police nga pamatud-an nga indi sila ang sa likod sang mga krimen nga tubtub subong, wala pa nahatagan sang kasolbaran.
