Ginkumpirma ni Department of Health Sec. Francsico Duque III nga pila ka mga nurse ang nag-untat sa trabaho bangud sa risgo nga matapikan sang Coronavirus Disease 2019 (COVID-19).
Suno kay Sec. Duque, na-istorya niya ang mga pribado nga ospital sa diin ginpahayag sang mga direktor nga mataas ang ila attrition rate — indi bangud nga kulang ang nurse kundi madamo sang mga ginikanan nga indi na nila luyag pabalikon sa trabaho ang ila mga anak nga nurse bangud sa kakulba kag pagkabalaka nga matapikan sang virus.
Pahayag niya, ang iban nga mga nurse ang may personal man nga rason kun ngaa indi na sila magbalik sa trabaho.
Nagakabudlayan man ang Department of Health sa pag-deploy sang mga doctors to the barrios sa Cebu bangud kinahanglan man ang mga ini sa ila tagsa ka mga lugar.
Dugang sang natungdan, sa subong nga may pandemya, importante gid ang pagpabatyag sang suporta sa mga medical workers.
Indi man madula ang kakulba suno kay Duque apang kabaylo man sini amo ang paghimo sang pamaagi agud mapasangkad ang compensation kag benepisyo sang mga medical workers lakip na ang routine testing, life insurance, accommodation, transport kag mental health services.
