ILOILO CITY – Masobra sa 200 ka Returning Overseas Filipino Workers ang temporaryo nga nagpabilin sa La Paz Public Plaza ka gab-i, Agosto 22, kasunod sang asud-asud nga sweeper flights papauli sa Iloilo.
Sa interview sang Bombo Radyo kay Arvin Suplico, seaman nga halin sa Germany, iya ginpahayag nga 8:30 ka gab-i, sang sila ang nag-abot sa syudad sang Iloilo kag halin sa Iloilo International Airport, ginsugat sila sang Ceres Bus apang sa wala ginlauman, ginpahibalo sila nga wala na sang bakante nga hotel room para sa ila 14-day quarantine.
Suno kay Suplico, nagakahangawa siya nga madugangan ang numero sang Returning Overseas Filipinos nga wala sang may matulugan ilabi pa nga may duha pa ka sweeper flights ang nagasunod.
Ang iban sa iya kaupod nga Returning Overseas Filipinos nga residente sang probinsya sang Iloilo ang nakakuha sang hotel room.
Agosto 14 suno sa natungdan sang nag-abot siya sa Metro Manila, Agosto 17 sang nagguwa ang negatibo nga resulta sang iya Reverse Transcription Polymerase Chain Reaction (RT-PCR) test kag Agosto 18 kun tani ang iya flight papauli sa syudad sang Iloilo apang may yara sang moratorium nga ginpaguwa ang Iloilo City Government.
