ILOILO CITY- Handa ang syudad sang Iloilo nga magbulig sa Overseas Workers Welfare Administration (OWWA) sa pagpatigayun sang quarantine facilities para sa mga returning Overseas Filipino Workers.
Sa interview sang Bombo Radyo kay Iloilo City Mayor Jerry Treñas, iya ginpahayag nga nakalab-ot sa iya talatapan nga madamo sang mga nagpalauli nga mga OFWS ang wala sang pasilidad nga sarang nila matiniran samtang nagapaidalom sa mandatory 14 day quarantine.
Suno kay Treñas ginpahanda niya ang Baluarte Elementary School kag Rizal Elementary School kag ginpaidalom man ini sa disinfection agud magamit sang mga Overseas Filipino Workers, bangud puno na ang mga hotels sa syudad sa diin masobra 2,000 ang nakaquarantine.
Nagpakig-angot naman siya suno sa alkalde kay Dr. Joseph Dean Nicolo ang Medical Center Chief sang Western Visyas Medical Center, agud mapadasig ang pagrelease sang mga test results sang una nga ginquarantine kag ma decongest ang mga hotels.
Dugang pa sang natungdan, gina-facilitate man subong sang syudad nga mabayaran sang OWWA ang ila balayran sa mga hotels nga nagserbe bilang quarantine facility.
