ILOILO CITY – Nagapati ang COVID-19 team nga COVID-19 ang ginkamatay sang 10 ka tuig nga bata nga babayi sa Brgy. Rizal Ibarra, Iloilo City.
Ini ang sa pihak sang pagpanindugan sang pamilya nga appendicitis ang ginkamatay sang pasyente.
Sa interview sang Bombo Radyo kay Public Safety and Transportation Management Office head Jeck Conlu kag nagaserbe man nga focal person sang COVID-19 team, iya ginpahayag nga antes gin-operahan ang bata, ginkuhaan anay ini sang swab sample para sa COVID-19 test.
Suno kay Conlu, nakumpirma nga nagpositibo sa COVID-19 ang pasyente nga sa ulihi naka-angkon sang renal failure.
Sa subong suno kay Conlu, ginahibalo pa kun paano nalatnan sang virus ang bata kag nagapadayon naman ang contact tracing.
Apisar nga gin-athag ni Punong Barangay Rodney Rafols nga sa iban nga barangay naga-istar ang pamilya apang suno kay Conlu, ang ila ginabasehan amo ang address nga ginpresentar sang pasyente.
