ILOILO CITY- Gindayaw ni Department of Environment and Natural Resources Secretary Roy Cimatu ang Iloilo River kasunod sang liwat niya nga pagbisita sa Iloilo para sa pagsinapol upod sa mga opisyal sang inter agency task force, Gov. Arthur “Toto” Defensor kag Iloilo City Mayor Jerry Treñas.
Sa interview sang Bombo Radyo Iloilo kay Cimatu nga chief implementer sang COVID-19 response sa Visayas, iya ginpahayag nga dalayawon nga wala ginapabay-an sang mga Ilonggo ang Iloilo River apisar nga may ginapangatubang nga krisis dala sang COVID-19 pandemic.
Suno kay Cimatu, modelo ang Iloilo River kun pagtipig sang dunang manggad ang istoryahan.
Pahayag pa niya, ini ang iya mangin ehemplo agud hangkaton man ang Cebu nga protektahan kag tinluan man ang ila suba kaangay sang ginahimo sang mga Ilonggos.
