ILOILO CITY – Wala sang may mahimo ang Iloilo City Government kundi sundon ang mandu sang Department of the Interior and Local Government nga batunon ang mga Locally Stranded Individuals apisar nga wala sang negatibo nga resulta sang Reverse Transcription Polymerase Chain Reaction (RT-PCR) test.
Sa interview sang Bombo Radyo kay Iloilo City Mayor Jerry Treñas, iya ginpahayag nga magasunod ang Iloilo City Government sa nasambit nga mandu kag maga-untat lamang ang pagbaton sang Locally Stranded Individuals kun buta na ang tanan nga quarantine facility.
Suno kay Treñas, may yara siya sang nakita nga disbentaha sa nasambit nga mandu bangud nga kun wala ginpaidalom sa RT-PCR test ang Locally Stranded Individual, may posibilidad nga may infected person nga makasimpon sa byahe kag mahimo nga tunaan sang local transmission sang virus.
Pag-abot naman diri sa syudad sang Iloilo, ginpahayag ni Treñas nga wala pa niya mahibalu-an kun ano ang manin pagsulundan may kaangtanan sa pagpatigayon sang RT-PCR test kag quarantine.
Kadungan sini, gin-athag sang alkalde nga lunsay na lang surgical lockdown ang ginapatuman sa mga barangay sa syudad sang Iloilo nga may yara sang mataas nga kaso sang COVID-19.
Ang Jaro Small Market suno sa natungdan ang magabukas na umpisa buwas nga adlaw, Agosto 28.
Kadungan sang pagsinapol kaupod sa COVID-19 team, ginpahayag sang alkalde nga iya nga ginpa-clear ang data bangud nga may yara sang report nga wala nagasanto.
Ang importante suno sa alkalde amo nga regular ang iya nga pagsapol sa COVID-19 team agud nga mahibalu-an ang estado sang syudad sang Iloilo kun COVID-19 ang pagahambalan.
