ILOILO CITY – Yara na sa medium risk ang status sang mga hospital sa Western Visayas kun COVID-19 ang pagahambalan.
Sa interview sang Bombo Radyo kay Dr. Marie Jocelyn Te, COVID-19 spokesperson sang Department of Health Region 6, iya ginpahayag nga yara na sa 56% ang overall utilization sa mga hospital kag kun pahat-pahaton, 67.12% ang utilization sa COVID-19 ward kun sa diin occupied na sa Iloilo City, 44% ang utilization sa ICU beds kun sa diin occupied na ang sa Iloilo City kag 62% naman ang ulitization sang isolation bed kun sa diin may gamay na lang nga bilin.
Suno kay Te, ginahingyo sang Department of Health sa private hospitals nga pasakaan ang bed capacity sang 20% samtang 30%-50% naman sa government hospitals.
Ginpahayag ni Te nga kinahanglan nga may yara sang bakante nga hospital beds ang mga asymptomatic nga COVID-19 patients nga may yara sang comorbidity ukon may existing nga balati-an.
Sa subong suno sa natungdan, may yara sang triage nga ginapatigayon sa pagpili sang mga pasyente nga nagakadapat nga i-admit sa hospital.
Isa man sa ginaproblemahan suno sa natungdan amo ang numero sang health care workers apang diri sa bahin sang Visayas, lauman nga sa masunod nga semana, maga-umpisa na sa pagtrabaho ang augmentation force.
Samtang, hibaluon pa ni Te kun bala matuod nga may supply sang possible COVID-19 drug nga Remdesivir nga gin-deliver sa Bacolod City.
Suno kay Te, ang mga health experts sa Bacolod City lang ang makasabat apang kun matuod gid man, mahimo nga may yara man sang supply nga para sa Iloilo.
