SAUDI ARABIA – Nagalaum ang duha ka Ilonggo Nurse sa Buraydah, Al Qassim, Kingdom of Saudi Arabia nga makapauli na sa Pilipinas sa labing madali nga tion.
Sa interview sang Bombo Radyo kay Maria Liza Durante sang Iloilo City, iya ginpahayag nga mga lima na ka bulan nga extended ang ila pagtrabaho sa dental clinic apisar nga natapos na ang ila kontrata sang Abril.
Suno kay Durante , naghingyo ang ila employer nga mag-extend sila sang bisan isa na lang ka bulan agud nga padayon ang pag-operate sang dental clinic.
Ginpahayag ni Durante nga gin-renew sang employer ang ila residence permit lakip na ang ila lisensya rason nga legal man sa gihapon ang ila pagtrabaho.
Sa pagkamatuod suno sa natungdan, makapila na ka bes sila nga nagprangka apang ginpahog pa sila sang employer nga ipa-cancel ang ila visa kag indi pag-ihatag ang tanan nga benefits sa sulod sang anum ka tuig nga pagtrabaho.
Sang 2018 pa sila nakapauli sa Pilipinas suno kay Durante kag luyag na nila nga maka-upod ang ila pamilya ilabi na subong nga may yara sang krisis.
Sang Hulyo 29, ginpahayag sang Ilongga Nurse nga nagpadulong sa talatapan sang Overseas Workers Welfare Administration Region 6 ang iya iloy agud magpangayo sang bulig apang tubtub subong, wala man sa gihapon sang feedback.
Nagakabalaka ang duha ka nurse bangud nalakip na ang ila pangalan sa August 30 nga repatriation apang tubtub subong, wala sang plano ang employer nga ihatag ang ila kinahanglanon nga dukomento.
