PAVIA, ILOILO – Wala sang kamatuoran nga gin-lockdown ang CPU Centennial Village sa Brgy. Aganan, Pavia, Iloilo kasunod sang pagpositibo sa COVID-19 sang isa ka doktor nga residente sang nasambit nga lugar.
Ini ang gin-athag sa Bombo Radyo ni Mayor Luigi Gorriceta.
Suno kay Gorriceta, nakuhaan na sang swab sample ang nasambit nga doktor kag sa subong, yara na ini nagatinir sa ila balay sa Jaro, Iloilo City.
Ginpahayag ni Gorriceta nga bangud nga wala na ang COVID-19 positive sa CPU Centennial Village, wala sang basehan agud nga magdeklarar sang lockdown.
Apisar sini, ginpahayag sang alkalde nga indi dapat magkampante ang mga pumuluyo kag sa baylo, dapat nga sundon sa gihapon ang minimum health protocol.
