ILOILO CITY– Inspirasyon sang Polycystic ovary syndrome (PCOS) survivor ang iya kondisyon agud ma-engganyo ang mga pumuluyo nga mangin sensitibo man sa iban nga tawo sa ila palibot kag indi dapat mangin judgemental.
Sa interview sang Bombo Radyo kay Kael Pruebas isa ka PCOS survivor, iya ginpahayag nga December 2018 sang siya ang na-diagnose nga may yara sang nasambit nga kondisyon sa diin may yara sang 13 ka cyst sa iya ovaries.
Suno kay Pruebas, lakip sa mga sintomas nga iya nabatyagan amo ang irregular period, pagtubo sang punggod sa iya guya kag likod, lakip na ang mood swings.
Apang sa subong may yara siya sang gina-inom nga pills para sa iya kondisyon.
Nagapangabay siya suno sa natungdan nga kuntani, kun may yara sang nagakatabo nga pagbag-o pisikal sa isa ka tawo dapat indi mangin judgemental kag sa baylo intindihon nalang ini agud indi na mangin tunaan sang insecurities
Samtang, ginpaathag man ni Dr. Elvin Tiangha nga ang PCOS ang isa ka hormonal problem sa isa ka babayi sa diin nagataas ang produksyon sang testosterone kung ipaanggid sa progesterone.
Kun may PCOS ang isa ka babayi suno sa doktor, mahimo man ini sa gihapon makabati sa tion nga ma-manage sang maayo, lakip na ang pagkaon kag pagpasigurado nga ginahalungan sang maayo ang lawas.
