ILOILO CITY- Wala sa gihapon masolusyunan ang problema sang mga homeowners nga mahigko nga tubig nga nagatubod sa ila gripo sa Deca Homes Subdivision, Pavia, Iloilo.
Sa interview sang Bombo Radyo kay alyas Mercedes, isa ka homeowner, iya ginpahayag nga nag-angkon na sang amoeba ang iya manugduha ka tuig nga bata matapos nagpaligo kag nakainom sang tubig nga gina-supply sang BP Waterworks Inc.
Suno kay Mercedes, mangin siya ang nag-angkon naman sang sakit sa panit bangud nga ang amo tubig man ang ginagamit niya sa pagpaligo.
Pangabay niya nga kuntani solusyunan gilayon ang problema bangud nga nagabayad man sila sang husto kag nagakadapat lang nga bayluhan ini sang maayo nga serbisyo.
Suno naman kay Mayor Luigi Gorriceta sang Pavia, Iloilo, nakapatawag na ini sang pagsinapol upod sa BP Waterworks, mga homeowners kag Metro Iloilo Water District.
Ginpahayag ni Gorriceta nga nag-request na ang BP Waterworks sa Metro Iloilo Water District agud magsupply sang tubig sa subdivision kag ini ang yara gihapon sa proseso sang negosasyon kag wala pa sang kapat-uran.
Gin-ako naman sang alkalde nga nagaugtas ini sa BP Waterworks matapos nga nagpamalibad ini nga pasudlon sa ila planta sa Balabag, Pavia ang sanitary inspector sang banwa.
