ILOILO CITY – One third sang manpower sa Western Visayas Medial Center Sub-National Laboratory ang nalatnan sang Coronavirus Disease 2019 (COVID-19).
Sa interview sang Bombo Radyo kay Dr. Stephanie Abello, Chief Pathologist sang nasambit nga laboratoryo, iya ginpahayag nga 22 ang technical staff ukon ang mga medical worker nga well-trained sa pagproseso sang specimen apang 6 na ang nalatnan sang COVID-19.
Bangud sini suno kay Abello, ang sadto anay apat ka team nga naga-duty ang nangin duha na lang ka team kag may 12 hour-shift sa tagsa ka adlaw.
May kaangtanan sa mga pagpakamalaot nga ila nabaton, ginpahayag sang natungdan nga indi man nila mabasol ang publiko bangud indi mahinago nga overworked na ang tanan nga medical staff sang laboratoryo bangud nga sobra ang specimen nga ila nabaton kun ipaanggid sa capacity.
Bangud sa daku nga exposure sa virus, ginpahayag ni Abello nga ginasakripisyo nila nga indi makapauli sa ila tagsa ka balay agud nga malimitahan ang risgo sang paglapta sang COVID-19.
Kun siya lang ang pamangkuton, ginpahayag ni Abello nga hospital shutdown na lang ang solusyon sa problema sang mga medical staff sa Western Visayas Medical Center Sub-National Laboratory apang bilang frontliner, katungdanan nila nga magtrabaho ilabi na subong nga may pandemya.
Tuhoy naman sa lihok nga dal-on pa sa Cebu ang mga specimen agud madula ang backlogs, ginpahayag ni Abello nga wala niya ini ginpaboran bangud nga magluwas nga trabahoso, mas mangin atrasado pa gid ang pagpaguwa sang resulta bangud nga kinahanglan pa nga ibyahe ang mga specimen.
Sa bahin sang Western Visayas Medical Center, ginabanta nga kapin sa 40 na nga medical staff ang nalatnan sang virus kun sa diin halos katunga ang admitted samtang ang iban naman ang nag-ayo na.
