Kahapon imo nahibaluan ang world’s most expensive peanut butter and jelly sandwich, gani bilang promisa bangud paborito mo ang taco, ari ang para sa imo.
Kun ang world’s most expensive peanut butter and jelly sandwich ang nagabalor sang P17,000, mapati ka bala nga ang taco nga ini halin sa Baja California sa Mexico ang imo mabakal sang P1.2 million?
Maggasto ka bala sang amu sina kadako nga kantidad para lang sa paborito mo nga taco? Daw kaangay lang ini nga nagbakal ka sang salakyan.
Si Juan Licerio Alcala, ang executive chef sa Grand Velas Los Cabos Resort, isa ka luxury vacation destination sa Baja California kag naghimo sang world’s most expensive taco.
Ginpasalig ni Alcala nga “worth it” ang bayad mo nga P1.2 million para lang sa isa ka taco.
Ini bangud nga may yara ini sang 24 carat gold flakes nga may Kobe beef, Almas Beluga caviar kag black truffle brie cheese.
Suno kay Alcala, excited kag nagakakibot man ang mga tawo sa presyo sang taco nga ila ginbaligya bangud sa Mexico may yara man sang taco nga ginabaligya sa dalan nga P110 lamang.
Gani iya gin-athag nga kun mag bakal ikaw sang taco, may yara ikaw sang protocol nga sundon.
Una sa tanan, ang manugbakal ang dapat nga magtinir sa presidential suite sa Grand Velas Los Cabos Resort kag mag deposito sang P605,000 agud nga ma preparahan na ang imo paborito nga taco.
Kun handa na ang taco, ini ang i-presentar sa imo sa tunga sang desyerto sa diin palibutan ikaw sang mga motorsiklo.
Weird di bala? Apang pahayag ni Alcala, kun ano man ang luyag sang kliente, ini ang ila nga pagasundon.
Daw kaangay nga kabigon ikaw bilang reyna sa tion nga magbakal sang pinakamahal nga taco sa bilog nga kalibutan.
Indi man mahimo nga taco lang ang yara sa imo nga lamesa bangud basi nga madunlan ikaw kag wala ka sang imnon.
Indi magkabalaka bangud may yara man sang ginaserbe ang resort nga tequila.
Kag indi ka makibot kun sukton ikaw bangud ang tequila ang nagabalor man lang sang P7 million.
Ini amo ang Ley.925 Pasión Azteca Ultra Premium Añejo — ang world’s most expensive bottle of tequila.
