ILOILO CITY – Nagpaguwa na sang panibag-o nga Executive Order si Mayor Jerry Treñas may kaangtanan sa pagpaidalom sa syudad sang Iloilo sa Modified General Community Quarantine epektibo subong nga adlaw, Setyembre 1.
Ini ang kasunod sang deklarasyon sang National Inter-Agency Task Force tuhoy sa panibag-o nga community quarantine classification sa pungsod.
Sa interview sang Bombo Radyo kay Treñas, iya ginpahayag nga lakip sa mga may yara sang adjustment amo ang sa curfew, pagbaligya sang makahulubog nga ilimnon, dine-in capacity sa mga kalan-an kag pagpatigayon sang mass gatherings.
Ang curfew ang maga-umpisa 10:00 sa gab-i tubtub 4:00 sa kaagahon samtang ang pagbaligya sang alcoholic drinks sa mga sari-sari store kag grocery stores ang kutub lang sa 6:00 sa kasisidmon samtang ang pag-inom sa mga restaurant ang kutub lang sa 8:00 sa gab-i.
Ginadumili-an ang pag-inom sa pampubliko nga lugar kasubong sa higad sang dalan ukon sa guwa sang sari-sari store ukon grocery store.
Ginapahanugutan na ang pagpatigayon sang mass gatherings apang nagakadapat nga sundon ang minimum health protocol kasubong sang pagsuksok sang face mask, face shield kag dapat nga sundon ang physical distancing samtang ang dine-in capacity sa mga kalan-an ang ginpataas sa 75%.
