ILOILO CITY – Nagsaka na sa 43 ang numero sang mga pulis sa Western Visayas nga nalatnan sang Coronavirus Disease 2019 (COVID-19).
Ini matapos nga subong nga adlaw, Setyembre 1, tatlo ang nagdugang sa listahan sang mga nagpositibo sa nasambit nga virus.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga ang duha sa tatlo ka mga pulis ang lunsay Patrolman, assigned sa Regional Personnel Holding and Accounting Unit apang detailed sa Iloilo City Police Office.
Ang isa sa duha ka Patrolman suno kay Malong ang nadistino sa Jaro Police Station samtang wala pa nahibalu-an kun diin nga police station nakadestino ang isa pa ka Patrolman.
Ang isa naman ka Non-Uniform Personnel nga nagpositibo sa COVID-19 ang assigned sa Police Station 1 kag close contact sang isa ka pulis nga una nga nagpositibo sa COVID-19.
Sa bug-os nga Western Visayas, 26 ang naka-facility quarantine, 16 ang naka-recover kag isa ang patay.
