PAVIA, ILOILO – Natalana nga sapulon sang Sangguniang Bayan sang Pavia, Iloilo ang mga tiglawas sang BP Waterworks Inc. agud maathagan tuhoy sa ginareklamo sang mga residente sa Deca Homes subdivision sa nasambit nga banwa.
Ini ang kasunod sang ginpatigayon nga sesyon sang municipal officials subong nga adlaw, Setyembre 1, agud istoryahan kun paano masolusyunan ang nasambit nga problema.
Sa interview sang Bombo Radyo kay Sangguniang Bayan Member Jose Maria “Pyt” Trimañez, chairman sang Committee on Environmental Protection, iya ginpahayag nga madamo ang nagapalab-ot sang reklamo tuhoy sa mahigko nga tubig nga gina-supply sang BP Waterworks Inc.
Suno kay Trimañez, bilang miyembro sang Municipal Water Resources Management Council, padal-an niya sang imbitasyon ang mga opisyal sang water distributor agud nga makasabat kag makapaathag sa tanan nga palamangkutanon sa patigayunon nga pagsinapol sa Setyembre 4.
Indi lang matul-id sang natungdan ang tuhoy sa background sang nasambit nga water distributor apang santo sa iya pagpanalawsaw, 2015 pa sang nag-umpisa ang nasambit nga negosyo diri sa Iloilo kag ang National Water Resources Board sa Metro Manila ang naghatag sang permit.
Investigation in aid of legislation ang pagahimuon sang Sangguniang Bayan kag ang ila desisyon ang nakadepende sa resulta sang pagsinapol sa Setyembre 4.
Nahibalu-an nga ginatubu-an na sang arikis kag iban pa nga skin diseases ang mga residente sa nasambit nga subdivision bangud sa mahigko nga tubig nga ila ginakonsumo.
