ILOILO CITY – Ginhangkat ni Inter-Agency Task Force Deputy Implementer for Visayas General Melquiades Feliciano ang mga Punong Barangay sa syudad sang Iloilo nga magpanikasog may kaangtanan sa ginapatigayon nga COVID-19 response.
Ini ang ginpahayag ni Feliciano kadungan sang iya pagpadulong sa syudad sang Iloilo, kahapon, Setyembre 2, kun sa diin gilayon niya nga ginsapol ang 180 ka mga Punong Barangay.
Sa interview sang Bombo Radyo kay Punong Barangay Roberto Niño, nagaserbe nga spokesperson sang Liga ng mga Barangay sa syudad sang Iloilo, iya ginpahayag nga nagpahanumdom si General Feliciano tuhoy sa katungdanan sang mga barangay officials sa away kontra COVID-19.
Suno kay Niño, daku ang mabulig sang tagsa ka Punong Barangay sa pagpatigayon sang contact tracing, information dissemination kag sa paghatag sang nagakaigo nga bulig nga kinahanglan sang ila nasakupan.
Ginpahayag ni Niño nga kinahanglan nga maghulag ang Barangay Health Emergency Response Team sa tagsa ka lugar may kaangtanan sa monitoring sang mga suspected COVID-19 patients.
Collective efforts gikan sa barangay tubtub sa national level suno sa natungdan ang ginapangayo ni General Feliciano.
