Gin-athag sang Department of Justice nga indi pa mahimo makagwa sa presuhan si US Marine Lance Corporal Joseph Scott Pemberton.
Ini ang kasunod sang pagmando sang Olongapo City Regional Trial Court sa paghilway kay Pemberton nga convicted sa pagpatay sa Filipino transgender woman nga si Jennifer Laude.
Si Pemberton ang convicted sa homicide sang Disyembre 1, 2015 bangud sa pagpatay kay Laude sang 2014 sa diin ginpamatbatan ini nga mapreso sang 6 tubtub 10 ka tuig.
Suno kay DOJ spokesperson Markk Perete, nagakadapat nga hulaton pa ang desisyon sa gin-file nga motion for reconsideration sang kampo ni Laude.
Matandaan nga nag-file sang motion for reconsideration ang legal counsel sang pamilya Laude nga si Atty. Virgie Suarez sa diin ginpakigbato nila nga indi dapat pagbuy-an si Pemberton tubtub indi makapakita sang pamatuod sa iya maayo nga pagbinatasan sa sulod sang presuhan.
Ginpahayag ni Atty. Suarez nga wala man makaagi si Pemberton nga nag-upod sa mga convicts sa New Bilibid Prison bangud naga-isahanon ini nga ginpreso sa Camp Aguinaldo.
Kaangot sini, ginpasalig sang Bureau of Corrections spokesperson Gabriel Chaclaag nga sundon ang mando sang Department of Justice nga ipabilin nga preso si Pemberton sa Camp Aguinaldo.
Matandaan nga nasapwan na lang nga patay si Laude sa sulod sang banyo sang isa ka motel kag nagasubsub na ang ulo sini sa basin matapos ginpatay ni Pemberton.
Suno kay Olongapo RTC Presiding Judge Roline M. Ginez-Jabalde, si Pemberton ang naka-accumulate na sang 10 ka tuig, isa ka bulan kag 10 ka adlaw.
Nadala na sa computation ang Good Conduct Time Allowance (GCTA).
Ang GCTA ang prebilihiyo nga ginahatag sa mga Person Deprived of Liberty (PDL) sa diin ginapanubo ang ila prison term sa kada bulan sang actual detention ukon serbisyo bilang padya sa good conduct kag exemplary behavior.
Humalin sang tuig 2017 tubtub Disyembre 2019, nakakuha ini sang 23 days reduction kada bulan humalin sang Enero tubtub Agusto 2020.
Ang actual nga pagkapreso ni Pemberton ang naglawig lang sang anom ka tuig.
