Ginkumpirma sang Philippine National Police (PNP) nga napatay sa sulod sang iya selda ang suspected drug lord kag former Ozamiz City Councilor nga si Ricardo “Ardot” Parojinog.
Si Ardot ang utod sang ginpatay nga si Ozamiz City Mayor Reynaldo Parojinog Sr.
Nagapangatubang si Ardot sang kaso nga paglapas sa Republic Act (RA) 9516 (illegal possession of firearms and explosives), RA 10591 (new firearms law), kag murder.
Nahibaluan nga madugay na nga nagapanago si Ardot antes nadakpan sa raid sang Hulyo 30, 2017 sa compound sang iya utod nga si Mayor Reynaldo.
Napatay sa nasambit nga raid ang 15 ka mga indibidwal lakip na ang alkalde kag iya tiayon.
Arestado naman sa nasambit nga raid ang mga anak sang alkalde nga sanday Ozamiz City Vice Mayor Nova Princess Parojinog kag Reynaldo Jr.
Matandaan nga si Presidente Rodrigo Duterte mismo ang nagtumod sa mga Pajorinog nga may kaangtanan sa narcotics trade.
Gilayon naman nga ginmado ni PNP Chief Police General Camilo Cascolan ang pag imbestigar sa kamatayon ni Ardot.
