ILOILO CITY – Nagapabilin sa gihapon sa morgue sang Western Visayas Medical Center ang bangkay sang siyam ka tuig nga bata nga ginbawi-an sang kabuhi matapos nabunggu-an kag nalapakan sang multicab sa Brgy. Tabuc Suba, Jaro, Iloilo City.
Sa interview sang Bombo Radyo kay Randy Pruelda, tiyo sang biktima, iya ginpahayag nga ginpanugyan sang medical experts nga ipa-cremate ang bangkay matapos naka-angkon sang exposure sa COVID-19 patients samtang yara sa emergency room sang nasambit nga hospital.
Suno kay Pruelda, indi gid magpasugot ang pamilya nga i-cremate ang bangkay bangud nga indi man COVID-19 ang ginkamatay sang bata.
Ginpahayag ni Pruelda nga ginkuhaan sang swab sample para sa COVID-19 test ang bata apang tubtub subong, wala pa napaguwa ang resulta.
Suno naman sa iloy nga si Emma Jagudilos, kaupod sang biktima nga nagtabok sa dalan ang iya pito ka tuig nga pakaisa sang nabunggu-an sang multicab.
Chest injury suno kay Jagudilos ang naangkon sang biktima matapos nalapakan sang salakyan.
Ginkwestyon man sang iloy kun nga-a kinahanglan gid nga ipa-cremate ang bangkay apisar nga wala man sang kahilabtanan sa virus ang ginkamatay sang subang niya nga anak.
