IRAN – Nag-umpisa na ang klase sang 15 million nga estudyante sa Iran apisar sang pamahog sang Coronavirus Disease 2019 (COVID-19).
Suno kay President Hassan Rouhani, kadungan sang pagbukas sang klase, mas daku ang katungdanan sang Iranian Government agud nga masigurado nga safe ang mga estudyante kag agud nga indi na madugangan ang COVID-19 cases sa nasambit nga pungsod.
Ginpahayag ni President Rouhani nga lunsay importante ang sektor sang edukasyon kag ang ikaayong lawas sa sosyodad apang wala ginapilit ang mga ginikanan nga pa-eskwelahon subong nga school year ang ila kabataan.
Suno sa Iranian media, ang klase sa mga seminaryo sa nasambit nga pungsod ang nag-umpisa naman kun sa diin ginabanta nga 50,000 ka estudyante ang nagpa-enroll.
May kaangtanan diri, pila ka medical professionals ang nagpabtuyag sang kahangawa may kaangtanan sa pagbukas sang klase sa mga eskwelahan kun sa diin ang Iran ang isa sa mga worst-hit countries kun coronavirus pandemic sa Middle East ang pagahambalan.
Sa subong, ang Iran ang may 384,666 confirmed COVID-19 cases, 332,131 ang naka-recover kag 22,154 ang ginbawi-an sang kabuhi.
