ILOILO – Nagalaum ang tiayon nga makapauli nga safe sang iya bana nga crew sang naglugdang nga Gulf Livestock 1 sa Japan.
Sa interview sang Bombo Radyo kay Jessica Sañonte, tiayon ni Julius Sañonte nga 2nd mate sa Gulf Livestock 1, iya ginpahayag nga hugot ang iya pagpangamuyo nga makapauli nga buhi ang iya bana.
Suno kay Sañonte, Setyembre 1 sang hapon ang pinaka-ulihi nga komunikasyon sang iya bana agud magpahibalo nga malain ang tyempo kag tuman ka dalagko ang balod bangud sa bagyo.
Dako ang iya pagsalig suno kay Sañonte bangud ang Gulf Livestock 1 man sang nakaligad nga tuig ang barko nga ginsakyan sang iya bana nga si Julius.
Ginpahayag man ni Sañonte nga matapos sadto, wala na liwat nakapakig-angot sa iya ang bana kag sang ginpadal-an niya sang mensahe, wala na ini naga-reply.
Amo na lang ang iya paghilibion suno kay Sañonte sang ginpahibalo siya sang pamilya sang iya bana tuhoy sa natabo sa nasambit nga barko.
Sa pagkamatuod suno sa natungdan, sang Hulyo 23 lang nakabalik sa pagbyahe ang iya bana.
Kasubong nga nabuhi-an siya sang paglaum sang nagpahibalo ang utod sang iya bata nga isa man ka seafarer nga may yara sang nakita nga lifeboat ang isa ka fishing boat sa Japan kag nagalaum sila nga sakay diri ang grupo ni Julius.
