ILOILO CITY – 200 ka benepisyaryo sa brgy. Rizal, lapaz, iloilo city, makabaton sang sap
Naglab-ot sa 200 ka mga benepisyaryo ang mahimo nga makabaton sang Social Amelioration Program sa Brgy. Rizal, La Paz, Iloilo City.
Sa interview sang Bombo Radyo kay Punong Barangay Chi Chi Narandan, iya ginpahayag nga subong nga adlaw, Setyembre 7, natalana ang pagpanghatag sang P6,000 nga cash assistance.
Suno kay Narandan, agud nga masunod ang physical distancing, ang 200 ka benepisyaryo ang pagatungaon sa grupo kun sa diin ang tagsa ka barangay official amo ang magagiya sa ila.
Ginpahayag ni Narandan nga magluwas sa 200, may yara sang ginabanta 32 pa ka mga benepisyaryo nga nagareklamo nga nadula ang ila pangalan sa lista.
Sa pagpaathag sang Punong Barangay, organisado ang listahan nga ila ginpasa sa Department of Social Welfare and Development apang may yara sang mga pangalan nga wala na nahibalu-an kun sa diin na nga barangay nalakip.
Samtang, amat-amat lang nga kuhaan sang swab sample para sa COVID-19 test ang mga punong barangay sa syudad sang Iloilo.
Ini ang kasunod sang pagpositibo sa virus sang pila ka mga punong barangay.
Duha ka adlaw ang gintalana suno sa opisyal para sa pagkuha sang swab sample.
Ang schedule ang gintalana umpisa Setyembre 7-8 kag apisar nga nakapaidalom na sa COVID-19 test, mas makapaayo suno sa punong barangay nga magpakuha siya liwat sang swab sample agud masiguro nga negatibo siya sa virus.
May kaangtanan naman sa COVID-19 cases sa ila lugar, ginpahayag sang natungdan nga nagnegatibo sa virus ang mga COVID-19 positive.
